თავდაცვის სამინისტროში „ალექსანდრე ქართველი და აშშ-ის სამხედრო ავიაცია“ პრეზენტაცია გაიმართა

შაბათი, 27 აპრილი, 2013 - 20:09

საქართველოს თავდაცვის სამინისტროში პროექტის „ალექსანდრე ქართველი და აშშ-ის სამხედრო ავიაცია“ პრეზენტაცია დღეს გაიმართა. ლეგენდარული ქართველი ავიაკონსტრუქტორის შესახებ გამართული ღონისძიება საქართველოს თავდაცვის უწყების ინიციატივით გაიმართა.

ღონისძიება საქართველოს თავდაცვის მინისტრმა ირაკლი ალასანიამ გახსნა. პროექტის პრეზენტაციას თავდაცვის სამინისტროსა და გაერთიანებული შტაბის ხელმძღვანელობა, აღმასრულებელი ხელისუფლების წარმომადგენლები, საქართველოში აკრედიტებული დიპლომატიური კორპუსი, ქართველი და უცხოელი ბიზნესმენები და საზოგადო მოღვაწეები დაესწრნენ.

“ალექსანდრე ქართველი აშშ-ის სამხედრო ავიაციის ერთ-ერთი ფუძემდებელი იყო. ცივი ომის დროს, როდესაც დასავლეთს საბჭოთა კავშირთან მიმართებაში სამხედრო უპირატესობა ჰქონდა - სწორედ ალექსანდრე ქართველის დამსახურება იყო. ეს იყო ქართველი გენიოსი, რომელიც 20-იან წლებში გაემგზავრა აშშ-ში და იქ დაიწყო სამხედრო თვითმფრინავების შექმნა. ყველა ქართველი ვამაყობთ იმით, რომ ასეთი დიდი გენიოსი წინაპარი გვყავდა, რომელმაც სამხედრო ავაიციაში საკუთარი სიტყვა შექმნა და დაამკვიდრა. ამერიკულ მხარესთან ერთად გვაქვს გეგმები, რომ ერთ-ერთი მისი შექმნილი თვითმფრინავი საქართველოში ჩამოვიყვანოთ, გავაკეთოთ მუზეუმი და ვიამაყოთ მისი დიდი ღვაწლით. თავდაცვის სამინისტრო დღეს აფიქსირებს საქართველოს მთავრობის პოზიციას, რომ ეს პროექტი ქართულ-ამერიკულ ურთიერთობებში იქნება ერთ-ერთი მნიშვნელოვანი და ჩვენი დამაახლოებელი” - განაცხადა ირაკლი ალასანიამ.

აშშ-ში მოღვაწე ქართველი ავიაკონსტრუქტორის შესახებ პრეზენტაცია სტუმრებს რეჟისორმა და მკვლევარმა რამაზ ბლუაშვილმა წარუდგინა. მან ალექსანდრე ქართველის (ქართველიშვილის) ცხოვრებისა და მოღვაწეობის შესახებ, ასევე პროექტის ძირითად ეტაპებზე ისაუბრა.

ქართველ ავიაკონსტრუქტორს აშშ-ის სამხედრო და აკადემიურ წრეებში ავიაციის ლეგენდად მიიჩნევენ. ალექსანდრე ქართველის (ქართველიშვილის) სახელს უკავშირდება 14 ამერიკული სამხედრო-საბრძოლო თვითმფრინავის შექმნა, მათ შორის P-35, P-47, F-84, F-105 და A-10. ეს ის თვითმფრინავებია, რომლებსაც აშშ-ს სამხედრო-საჰაერო ძალები ყველაზე მასშტაბურ სამხედრო კამპანიებში იყენებდნენ - II მსოფლიო ომში, კორეაში, ვიეტნამში, ერაყში, ავღანეთში და ა.შ. ქართველი ავიაკონსტრუქტორის მიერ შექმნილი ერთ-ერთი სამხედრო-საბრძოლო თვითმფრინავი A-10 Thunderbolt II ნატოს წევრი ქვეყნების შეიარაღებაში დღემდე გამოიყენება. ალექსანდრე ქართველი (ქართველიშვილი) აშშ-ის ატომურ და „ნასას“ პროექტებშიც იყო ჩართული. მან უდიდესი როლი შეასრულა აშშ-ის საჰაერო ძალების ისტორიაში. მის მიერ შექმნილი პროექტები დღემდე განხორციელების პროცესშია.

რეჟისორმა და მკვლევარმა რამაზ ბლუაშვილმა პროექტის „ალექსანდრე ქართველი და აშშ-ის სამხედრო ავიაცია“ ოთხ ძირითად ეტაპზე გაამახვილა ყურდაღება. როგორც მან აღნიშნა, უდიდესი ქართველი ავიატორის საქართველოში უკეთ გასაცნობად და მსოფლიოს წინაშე მისი დამსახურების პოპულარიზაციისთვის, მნიშვნელოვანია მის მიერ შექმნილი ერთ-ერთი თვითმფრინავის საქართველოში საექსპოზიციოდ ჩამოტანა. ასევე, იგეგმება ალექსანდრე ქართველის მუზეუმის შექმნა, სადაც ავიაკონსტრუქტორის პირადი ნივთები, საარქივო დოკუმენტები, წერილები, ფოტოები და თვითმფრინავის მოდელები გამოიფინება.

რეჟისორმა რამაზ ბლუაშვილმა ალექსანდრე ქართველის ცხოვრებისა და მოღვაწეობის შესახებ მხატვრულ-დოკუმენტური ფილმის გადაღებაზეც ისაუბრა. პროექტის ფარგლებში, ასევე იგეგმებ ა ქართველი ავიატორის შესახებ ორენოვანი, მხატვრულ-სამეცნიერო წიგნის გამოცემა.

პრეზენტაციის დასრულების შემდეგ, მოწვეულ სტუმრებს რამაზ ბლუაშვილმა ალექსანდრე ქართველის შესახებ ფილმის თრეილერი წარუდგინა, რომელიც აშშ-ის საავიაციო მუზეუმებიდან, „ნასა“-დან და აშშ-ს საჰაერო ძალების არქივებიდან გამოთხოვილი მასალების საფუძველზე შექმნა.

პროექტზე რეჟისორ რამაზ ბლუაშვილთან ერთად, ქართულ-ამერიკული ცენტრი „ლანგეითი“-ც მუშაობს. ცენტრში უშუალოდ საქართველოს თავდაცვის მინისტრისთვის გასული წლის დეკემბერში პროექტის პრეზენტაცია გაიმართა.

 

მსგავსი სიახლეები

სოციალური ქსელი

გამოკითხვა

ვალუტა

  • 2.7
  • 3.18
  • 3.57
  • 0.05
  • 0.7
  • 1.59