რუსთავის "მეტალურგის" მმართველმა დირექტორმა გუშინ, ფოთში, გუნდთან ერთად საქართველოს ჩემპიონობა იზეიმა. მაგრამ სულ ტყუილად. აღმასკომმა, თქვენ არა, დებულებით "ზესტაფონია" ჩემპიონიო. არადა,  გუშინ გახარებულ ქვემოქართლელებს ჩემპიონობა, თავად სფფ-ს პრეზიდენტმა ზვიად სიჭინავამაც მიულოცა. დღეს ფედერაციაში, აღმასკომის სხდომაზე ბევრი იმსჯელეს და ძაღლის თავიც აღმოაჩინეს.

მათ მიერ დამტკიცებულ დებულებაში, ერთადერთი სიტყვა ყოფილა შეცდომით, რამაც ქაოსი გამოიწვია - პლეი ოფის ნაცვლად ჩემპიონატი წერია. ამიტომ ბატონმა ზვიადმა თავისი სიტყვა უკან წაიღო და საქართველოს 23-ე ჩემპიონად "ზესტაფონი" გამოაცხადა.

რა თქმა უნდა, ამ ფაქტმა რუსთაველები აღაშფოთა და თავისი სიმართლის დამტკიცებას გეგმავენ. ჩენ რუსთავის "მეტალურგის" მმართველ დირექტორს ბუბა ტყავაძეს დავუკავშირდით.

"რა თქმა უნდა, ჩვენ არ ვეთანხმებით აღმასკომის გადაწყვეტილებას, რომელმაც ჩემპიონად "ზესტაფონი" გამოაცხადა. სინამდვილეში კი ეს ტიტული "მეტალურგს" ეკუთვნის. განვმარტავ რატომ - საქართველოს 2011-12 წ.წ. ეროვნული ჩემპიონატის დებულების 3.3 და 4.4 მუხლებს: "უმაღლესი ლიგის 1-8 ადგილებზე გასულ გუნდებს მეორე ეტაპზე გადაჰყვებათ პირველ ეტაპზე ნათამაშევი მატჩების შედეგები (თამაში, მოგება, ფრე, წაგება, ბურთების სხვაობა და ქულები). თანაბარი ქულების დაგროვების შემთხვევაში ადგილები გაირკვევა 1-8 ადგილების საბოლოო ცხრილის შედეგების შესაბამისად ჩემპიონატის დებულების 4.4.1., 4.4.2., 4.4.3., 4.4.4., 4.4.5., 4.4.6. და 4.4.7. მუხლების მიხედვით".

ძალიან საინტერესოა, რის საფუძველზე მიიღო აღმასკომმა დღევანდელი გადაწყვეტილება. ჩვენ დაველოდებით დღეს გამართული საგანგებო აღმასკომის სხდომის ოქმს და შემდეგ, აუცილებლად გავასაჩივრებთ, იქ სადაც საჭირო იქნება - საქართველოს ფეხბურთის ფედერაციასა თუ უეფაში.

ფეხბურთის ფედერაციის პრეზიდენტმა მართლაც მომილოცა ჩემი გუნდის გაჩემპიონება,  დღეს კი მითხრა, ეს გადაწყვეტილება მე კი არა,  აღმასკომმა მიიღოო", - განაცხადა ბუბა ტყვაძემ.

სალომე ბალახაშვილი

Geosports.ge