თბილისში თოვლის საფარმა უკვე ათ სანტიმეტრს გადააჭარბა. დედაქალაქში მთელი ღამის განმავლობაში თოვდა, თუმცა,  გადაადგილების მხრივ მძღოლებს სერიოზული პრობლემები არ შექმნიათ. თბილისის დასუფთავების სამსახური მუშაობის საგანგებო რეჟიმზეა გადასული. ამ დროისათვის ტექნიკური მარილი ყველა ცენტრალურ ქუჩაზეა დაყრილი.

„თბილისი ქუჩებზე მთელი ღამის განმავლობაში მარილი დაახლოებით სამჯერ მოვაყარეთ. დასუფთაავების სამსახური მთლიანად მობილიზებულია. მინდა აღვნიშნო, რომ ასეთი ნალექი ძალიან დიდი ხანია არ გვახსოვს. ამ წუთებშიც მიმდინარეობს ქუჩებზე მარილის მოყრის სამუშაოები და ჩვენი სამსახური 24 საათის განმავლობაში მუშაობს. ჩვენი სამსახური აღნიშნულ სამუშაოებს გააგრძელებს მანამ, სანამ საჭირო იქნება“, -განაცხადა „ჯეონიუსთან“ საუბრისას თბილისის დასუფთავების სამსახურის უფროსმა, თორნიკე შიოლაშვილმა.

დასუფთავების სამსახურის უფროსის თქმით, ამ ეტაპზე ცენტრალურ ქუჩებზე მოძრაობა შეუფერხებლადაა შესაძლებელი.

„ძალიან დიდი ნალექია, ამასთან ერთად არის ყინვა და მთლიანად მობილიზებულები ვართ. ამ ეტაპზე ცენტრალური ქუჩებზე მარილი დაყრილია და მოძრაობა შესაძლებელია. ვაგრძელებთ სამუშაობს მეორეხარისხოვანი ქუჩების გასაწმენდად. მინდა გითხრათ, რომ ამ ეტაპზე მოძრაობა არსად შეჩერებული არ არის ნალექის გამო“,-განაცხადა შიოლაშვილმა.

კლიმატურ ცვლილებებს სინოპტიკოსები გლობალურ დათბობას უკავშირებენ, რასაც დედამიწის ზედაპირზე ტემპერატურის აწევა მოჰყვა. სპეციალისტთა განმარტებით, თითქოსდა უმნიშნველო ცვლილებამ - 0,7 გრადუსით მატებამ კლიმატური რეჟიმი შეცვალა.

დღეიდან ამინდი საქართველოში კვლავ გაუარესდება. თოვა საქართველოს მთელს ტერიტორიაზეა მოსალოდნელი. შენარჩუნდება ყინვაც. ტემპერატურა თბილისში -7 გრადუსამდე დაეცემა, აღმოსავლეთ საქართველოში -14, დასავლეთში კი -2 გრადუსი იქნება. უამინდობა საქართველოში 12 თებერვლამდე გასტანს.