თბილისელები დასუფთავების გადასახადს ახალი სისტემით გადაიხდიან, რომლის მიხედვით, ყოველ დახარჯულ 1 კილოვატ ელექტროენერგიაზე დასუფთავების გადასახადი 5 თეთრით განისაზღვრება.ცნობისთვის, ქვითრების დარიგება დღეიდან დაიწყო.

დასუფთავების გადასახადის ახალი სისტემის დეტალები მოსახლეობას გლდანისა და დიდუბის მაჟორიტარმა დეპუტატებმა ნიკოლოზ ხაჩირაშვილმა და გოგა ჩაჩანიძემ პირადად გააცნეს.

დასუფთავების გადასახადის ახალი სისტემა სოციალურად სამართლიანია, რადგან შესაძლებლობას იძლევა, მოსახლეობამ ელექტროენერგია დაზოგოს და შესაბამისად, დასუფთავების გადასახადიც ნაკლები გადაიხადოს.

გადახდის ახალი სისტემით, საშუალო და დაბალი შემოსავლის მქონე ოჯახები ბევრად უფრო ნაკლებს გადაიხდიან, ვიდრე დღევანდელი მდგომარეობით იხდიდნენ.

მნიშვნელოვანია, რომ სოციალურად დაუცველი მოსახლეობის გადასახადის ნახევარს მერია დაფარავს, გადასახადს აღარ გადაიხდიან ის ოჯახები, რომელთაც ბინები დაკეტილი აქვთ, კონკრეტულ მისამართზე რეალურად არ ცხოვრობენ და ასევე ის ოჯახებიც, რომლებიც ზაფხულისა და ზამთრის პერიოდში ქალაქიდან დასასვენებლად არიან გასულნი.

დასუფთავების სფეროში წლების განმავლობაში აქტიურად ხორციელდება სხვადასხვა რეფორმა. ქალაქის სისუფთავეზე ყოველდღიურად 3 300 ადამიანი ზრუნავს.

ბოლო წლებში გაუქმდა კორპუსებში არსებული ბუნკერები, დაიხურა გლდანისა და იალღუჯას ნაგავსაყრელები, თბილისის შემოგარენში აშენდა ახალი, თანამედროვე სტანდარტების ნაგავსაყრელი პოლიგონი და ყველა ამ რეფორმის შედეგად, დღეს თბილისი ბევრად უფრო სუფთა ქალაქია, ვიდრე წლების წინ. თბილისის მერია ამ მიმართულებით სხვადასხვა მნიშვნელოვანი პროექტის განხორციელებას მომავალშიც გეგმავს.