კინოს სახლში ფოტოხელოვანისა და პოეტის, შალვა ლონდარიძის პოეზიის საღამო გაიმართა. დარბაზში შეკრებილმა საზოგადოებამ „ლამანის მირაჟი“,

„ცხელი ყვავილი“, „აღმოსავლეთის მისტერია“ „ია ვარ ია“ და პოეტის შემოქმედებიდან სხვა ცნობილი ლექსები მოისმინა. ლექსები კი პოეტმა თამუნა ხელაძემ და “საზოგადოება უსახელო პოეტები“-ს წარმომადგენელმა გიორგი გოგილაშვილმა წაიკითხეს.

„შალვა უნიჭიერესი ადამიანია, მისი პოეზია ძალიან მგრძნობიარეა და სიღრმისეული. დღევანდელი საღამოს მასპინძელს ადრეც ვთხოვე ფართო აუდიტორიის წინაშე გამოსვლა, თუმცა ავტორის მოკრძალებული ხასიათიდან გამომდინარე, მაშინ, მისივე შემოქმედების თაყვანისცემლებს არ გაგვიმართლა. მიხარია, რომ დღეს სრულიად რადიკალური სურათია და ჩვენ მისი პოეზიის რითმებისა და ნააზრევის თანამონაწილეები ამ დარბაზში საჯაროდ გავხდით. ამ შედეგს კი, მე და ჩემმა მეგობრებმა შალვასადმი დაბეჯითებული თხოვნის შედეგად მივაღწიეთ“, - განაცხადა საღამოს ერთ-ერთმა ორგანიზატორმა ირინა თურქიამ.

მოგვიანებით საკუთარი ლექსები პოეტებმა: დავით რობაქიძემ და ეკა დონდუამ შალვას საპატივცემულოდ წაიკითხეს.

დღევანდელი საღამო მუსიკალურად ჯგუფმა „მიZიკამ“ გააფორმა. ჯგუფის წევრებმა მათივე რეპერტუარიდან ლირიული ჟანრის სიმღერები შეასრულეს.

ერთი თვის წინ უკრაინული მხარის ინიციატივით, შალვა ლონდარიძის ლექსების პრეზენტაცია უკრაინის დედაქალაქ კიევშიც გაიმართა, ასევე მოეწყო მისი ფოტონამუშევრების სამი პერსონალური გამოფენა. უახლოეს მომავალში შალვას ლექსები უკრაინულ ენაზეც ითარგმნება, წლის ბოლოს კი მკითხველს საშუალება ექნება ავტორის შემოქმედებას ბეჭდური სახით გაეცნოს.