უამინდობის მიუხედავად,  გერმანიაში  ბერლინალესთვის ემზადებიან. ფესტივალი ბერლინში დღეს საღამოს იხსნება. ბერლინალე პალასის წინ უკვე დასრულებულია მოსამზადებელი სამუშაოები,  დაგებულია წითელი ხალიჩა.

რიგით 62-ე საერთაშორისო კინოფესტივალს ფრანგული დრამა "მშვიდობით ჩემო დედოფალო" გახსნის. კინოფესტივალი 10 დღის განმავლობაში გასტანს.

ცნობისთვის, ბერლინის საერთაშორისო კინოფესტივალი ანუ ბერლინალე, მსოფლიოში კინოს ერთ-ერთი უმნიშვნელოვანესი ფესტივალია. ტარდება ყოველი წლის თებერვალში.

ბერლინალე მნიშვნელოვანი მოვლენაა კინემატოგრაფიასა და მასმედიაში. ყოველწლიურად მასზე ესწრება 76 ქვეყნის წარმომადგენელი 15 000 სპეციალისტი, მათ შორის 3 500 ჟურნალისტი. სეანსებზე დასწრება ფასიანია. ბერლინის ფესტივალი დაარსდა 1951 წელს. თავდაპირველად იგი ზაფხულში ტარდებოდა, 1978 წლიდან კი თებერვალში გადაიტანეს. პირველი ბერლინალეს გახსნა შედგა 1951 წლის 6 ივნისს ალფრედ ჰიჩკოკის ფილმით "რებეკა".

ბერლინის კინოფესტივალზე ფილმები მთელი მსოფლიოდან მოდის და მათი შერჩევა საერთაშორისო ხასიათისაა. საუკეთესო ფილმები ჯილდოვდება "ოქროს დათვი"-თ, საუკეთესო რეჟისურის, საუკეთესო ქალის როლისა და საუკეთესო მამაკაცის როლისათვის განკუთვნილია ვერცხლის დათვი, საპატიო ოქროს დათვი გადაეცემა კინოს სფეროში მოღვაწე პროფესიონალებს კინემატოგრაფიაში შეტანილი წვლილისათვის.